BAGUIO CITY–Inlawlawag ni Tabuk City Mayor Darwin Estranero nga awan ti panagtubngarna iti singasing a proyekto ti Upper Tabuk Hydro Power Plant.
Iti interview ti Bombo Radyo Baguio kenkuana, impettengna nga awan iti saan a mangkayat iti nasao a proyekto ngem nasken laeng a magna iti umno a proseso.
Dinakamatna nga adu dagiti kasapulan nga isimpa a papeles ken adu dagiti reklamo dagiti Indigenous Culturual Community (ICCs) a kasapulan a maikonsulta.
Maipalagip a nairaman ni Mayor Estranero ti isyu seknan iti pannakaipatungpal ti nasao a proyekto kasaruno iti panangipeksana a tarigagayna a sumrek ti Dallac-Nanong-Minanga Indigenous Peoples Organization (DANAMI IPO) iti baro a Memorandum of Agreement iti construction firm a pabor kenkuana
Ti DANAMI IPO ket ti organisasyon a mangidadaulo iti nasao a proyekto.
Mainaig iti dayta, inpanamnama met ni Estranero iti pannakaaprobar ti proyekto iti opisina daytoy iti kanito a maresolbar dagiti rumrumsua a parikot iti benneg dagiti Indeginous Peoples.
KABAYATANA,
Impasiguradona nga adda iti umdas ken nakasagana a pondo dagitoy para iti pannakagatang ti bakuna kontra COVID19 a maiwaras sadiay.
Iti interview ti Bombo Radyo Baguio, kinunana nga urayenda laeng iti panawen nga adda iti mass production ti bakuna kontra COVID19 tapnu makagatang dagitoy para kadagiti umili daytoy.
Inlawlawagna nga imbilin ti regional office ti Department of Health nga isaganada ti listaan dagiti frontliners a kasapulan a maipangruna a maipaayan ti bakuna gapu ta nasyonal a gobierno iti gumatang para kadakuada.
Nupay kasta, kinunana a madama iti panagsaganada iti vaccination plan dagitoy ken iti agserbi kas storage facility dagiti bakuna a maiwaras kadagiti umili sadiay.
