Insardengen ti Department of Labor and Employment (DOLE) ti mangipaay ti work permit, kadagiti gangganaet nga agtartrabaho kadagiti kompania ti Philippine offshore gaming operator (POGO), sipud idi Mayo a dos iti agdama a tawen.
Sigun kenni Sarah Mirasol, Director ti Department of Labor & Employment-National Capital Region, awatenda laeng dagiti aplikasion para iti regular internet gaming licenses, provisional internet gaming licenses wenno addaan ti notice of approval ti local gaming agents, training program providers, independent testing laboratories ken dadduma pay.
Innayon ti nasao nga opisyal a ma-cross-check dagiti lisensia, authorizations ken accreditation wenno dagiti notice of approvalda iti listaan nga impaay ti Philippine Amusement and Gaming Corporation (PAGCOR) wenno ti listaan a kanayon nga ipapaay ti state gaming agency tapno ma-verify ti authenticity dagitoy.
Maipalagip a sumagmamano a grupo ti mangidurduron iti pannakaserra dagiti Philippine offshore gaming operator (POGO) iti pagilian, gapu iti social cost dagitoy ken naaramat kadagiti kriminal nga aktibidad a pakairamanan ti scam operations, human ken sex trafficking, illegal immigration ken employment, kidnapping ken dadduma pay a nakaam-amak a krimen.
