Pinalagipan ti Department of Education-Cordillera(DepEd-CAR) dagiti delegado iti 2026 Cordillera Administrative Region Athletic Association(CARAA) Meet seknan iti posible a panagturong dagitoy kadagiti pagpasyaran bayat ti nasao a pasalip.
Sigun kenni DepEd-CAR Regional Director Estela P. Leon Cariño, mabalin dagiti atleta nga agpasyar kadagiti nagduduma a destinasyon wenno pagpasyaran laketdi nalpas ti ay-ayam dagitoy ken kadwada dagiti coaches, maestro/maestra, wenno dagiti parentesda.
Bigbigbigen ni Cariño ti gundaway para kadagiti delegado nga agpasyar kabayatan ti pasalip nangruna ket maigiddan dagiti daduma nga iskedyul daytoy iti nalatak a pasken ti Baguio City a Panagbenga Festival a pakaang-angayan dagiti nagduduma nga aktibidad.
Kasta metten a gundaway daytoy a maaddaan dagiti atleta iti kanayonan a learning experience.
Nupay kasta, inyunay-unay ni Cariño a saan a rumbeng nga agmaymaysa wenno agsolsolo dagiti atleta nga agpasyar.
Kagiddan dayta,impetteng ti opisyal a maiparit ti panagpasyar dagiti delegado iti rabii gapu ta adda ti curfew para kadagiti atleta.
Gapu iti dayta,kidkiddawenna ti kooperasyon dagiti maseknan a nu mabalbalin ket tunggal aldaw laeng ti panagpasyar kadagiti nagduduma a tourist destination tapno maliklikan metlaeng ti panakabannog dagiti atleta kaspangarigan adda ti ay-ayamda iti kabigatan.
Maipalagip nga immunan a naipakaammo nga manamnama ti isasangpet dagiti delegado inton February 20 iti host province a Benguet para iti 2026 nga edisyon iti CARAA.
Naituding met nga agleppas daytoy inton February 27, 2026.//Bombo Jerwin Aquino
