BAGUIO CITY – Naipasidongen iti red alert status ti Disaster Risk Reduction and Management Office (CDRRMO) kagiddan ti panagrugi ti holyweek ita a lawas.
Iti interview ti Bombo Radyo kenni Julius Santos, operations head ti City Disaster Risk Reduction and Management Office (CDRRMO), napasamak ti koordinasayon iti nagbaetan daytoy ken dagiti daduma pay a maseknan nga opisina para iti pannagpatalinaed iti kappia ken seguridad kadagiti turista ken kadagiti residente iti siudad.
Dinakamat ni Santos a napakaammoan metten dagiti maseknan a Barangay officials nga agtalinaed dagitoy nga alerto ken dagus nga ireportda dagiti aniaman nga insidente a posible a mapasamak kadagiti turista/bisita nga agturong kadagiti nalatak a pagpasyaran iti masakupan dagitoy.
Mainaig iti dayta, karaman kadagiti maipangruna a mamonitor a lugar iti siudad ket dagiti convergence zone wenno dagiti pagturturongan dagiti adu nga indibidwal kas iti simbaan ken terminals.
Kabayatanna, maguyguyugoy dagiti turista a dumalan iti Marcos Highway para iti nataltalged a panagbiahe dagitoy.
Maur-uray paylaeng met ti pakaammo dagiti maseknan nga opisina seknan iti number coding scheme kadagiti motorista iti siudad.//Bombo Rob Dominguez
