Ad-adalen ti Department of Health (DOH) ti panakaiparit ti “mukbang” wenno dagiti maipapan iti eating vlogs.
Daytoy ket kasaruno ti ipupusay ti maysa a mukbang vlogger idiay Iligan gapu iti stroke.
Sigun kenni Department of Health (DOH) Secretary Teddy Herbosa, ti “overeating” wenno sobra a panangan ket saan a nasayaat agsipud ta mabalin daytoy a mangitunda iti obesity a mabalin nga agresulta iti hypertension, heart attacks ken daduma pay a non-communicable diseases.
Malaksid iti dayta, kinuna ni Herbosa a ti panagbuya kadagiti mukbang videos ket mabalin pay nga agresulta iti eating disorders ken internet addiction.
“It’s asking, making people eat like gluttons. You can earn income as long as it does not produce health risks. If you’re earning from something that is a public health threat, I will have to stop you.”
Teddy Herbosa, Department of Health (DOH) Secretary
Gapu iti dayta, nangipaulog ni Herbosa iti public health warning kadagiti mukbang videos bayat a kidkidawenna nu kasano ti regulation daytoy.
Nu pay kasta, kinuna dagiti daduma a mukbang vloggers a saan met a negatibo ti epekto ti panagmukbang dagitoy gapu ta kadagiti daduma nga tattao ket agbalbalin nga inspirasyon daytoy kadakuada.
