BAGUIO CITY – Naka alerto ita dagiti health officials ti rehiyon Cordillera kasaruno iti naobserbaran a panagngato ti kaso ti aktibo a kaso ti COVID19 sadiay Apayao ken Baguio City
Sigun ken Karen Lonogan, dadaulo ti Regional Epidemiology and Surveillance Unit (RESU), agtultuloy ti monitoringda iti kaso ti COVID19 iti rehiyon kasaruno iti pannakailista ti 10 nga aktibo a kaso dua a lawas ti naglabas
Kinunana nga agsagsaganada ita iti panagwanawan kadagiti clustering dagiti kaso ti nasao a sakit kasaruno iti pannakapalukay ti implementasyon ti minimum public health standards ken ti presensya ti baro a variants ti COVID19
Innayunna nga iti baet ti nababa a bilang ti kaso a mailislista iti inaldaw ket adda latta iti obserbasyon a panagngato ti bilang dagitoy
Iti agdama, nakailista ti sag-uppat nga aktibo a kaso ti Apayao ken Baguio City a nakailistaan ti 75 percent a two-week growth rate bayat a nakailista iti saggaysa nga aktibo a kaso ti Abra ken Mountain Province ken agtaltalinaed met a zero active case ti probinsya ti Benguet, Ifugao, ken Kalinga
Gapu iti dayta, kinuna ni Lonogan nga itultuloyda ti surveillance ken contact tracing tapnu maipasigurado ti pannakaisolate dagiti posible a nakaptan iti COVID19 tapnu maliklikan iti ad-adda a panagwaras daytoy
Maipalagip a nailista ditoy Baguio City ti kaunaan a subvariant ti Omicron idi laeng kalman
Kagiddan iti dayta, inpanamnama ni Lonogan a saan a nagwaras ti virus iti syudad ken rehiyon Cordillera
