BAGUIO CITY – Im-imbestigaran ita ti pulisya ti rason iti panagpakamatay ti maysa a doktor ken maysa a baro iti nagsina a suicide incident ditoy siudad ti Baguio idi kalman.
Nasarakan a nakabitin ti bagi ti 44-anyos a lalaki a doktor iti tawa ti banyo ti balayda sadiay Suello Village, Bakakeng Central.
Sigun iti pulisya, nagaramat daytoy iti extension wire.
Naitaray pay iti pagagasan ti nasao a doktor ngem naideklara a pimmusayen daytoy.
Naamuan a saan a daytoy ti kaunaan a gundaway a ginandat ti nasao a doktor a tubo ti Rosales, Pangasinan a nangkettel iti bukodna a biag.
Kabayatanna, mapapati metlaeng a nagpakamatay ti 19-anyos a baro kalpasan a nasarakan ti bagina a nakabitin iti silidna sadiay Forest Gold, Bakakeng Sur.
Sigun iti pulisya, nagaramat daytoy iti kurtina.
Naituding a maiyawid ti bangkayna sadiay Amagbagan, Pozorrubio, Pangasinan.
