BAGUIO CITY – Nagballaag ni Mayor Benjamin Magalong kadagiti indibidual ken nagduduma a grupo nga awanan iti permit a mangisaysayangkat iti solicitation wenno donation drive para kadagiti biktima ti bagyo.
Sigun kenkuana, agtultuloy ti panagbantayda kadagiti indibidual ken grupo a mangisaysayangkat iti donation drive nga awanan iti permit manipod iti City Social Welfare and Develeopment Office (CSWDO) wenno iti Department of Social Welfare and Development (DSWD).
Sigun ken ni CSWDO Department Head Betty Fangasan, dayawenda ti inisiatibo dagiti pribado a grupo ken indibidual tapnu mangisayangkat iti relief missions ngem nasken nga adaan dagitoy iti permit.
Inallukoyna dagitoy a grupo wenno indibidual nga agkiddaw iti permiso iti CSWDO tapnu agbalin a lehitimo ti proyekto dagitoy gapu ta mandatory ti panangala iti Solication Permit kas maibasar iti Presidential Decree 1564 wenno iti Solicitation Permit Law.
