Naituding a mapilaan iti Reckless Imprudence Resulting in Homicide ti driver a nakadungpar iti pimmusay a 75-anyos iti maysa a paradaan iti siudad ti Baguio idi May 22, 2025.
Ti biktima ket immunan a nabigbig a ni Ignacio Lingbanan Nanam Sr., naasawaan, retired government employee ken residente sadiay AC 057 Central Ambiong La Trinidad, Benguet.
Iti inisyal nga imbestigasyon dagiti nagresponde a traffic investigators manipud iti Traffic Enforcement Unit (TEU) iti Baguio City Police Office (BCPO), naammuan a ti ford ranger pickup nga imanmaneho ti 34-anyos, awanan asawa, technician ken residente iti siudad ti Baguio ti nakadungpar iti nasao a biktima.
Dagus met a naitaray ti biktima iti Baguio General Hospital and Medical Center ngem indeklara ti attending physician daytoy a dead upon arrival.
Maisagsagana metten dagiti kaskenan a dokumento para iti inquest proceeding iti nasao nga insidente bayat nga adda iti kustodiya ti pulisya ti nasao a driver.
