BAGUIO CITY – Malamlamayan ita ti maysa a lalaki kalpasan a pimmusay idi aksidente a napandagan ti imanmanehona a jeep sadiay Gulon, Ambiong, La Trinidad, Benguet idi kanikadua.
Nabigbig daytoy a ni Jordan Burcao, 40-anyos, driver ken residente ti Navy Base, Baguio City.
Maibasar iti report, imparada ti biktima ti imanmanehona a jeep nga addaan plaka a DLY 997 iti pasang-at a paset ti kalsada.
Pina-andarna ti lugan sakbay a bimmaba tapnu ikkatenna ti bato a kalso daytoy.
Nupay kasta, killaat nga immatras ti jeep isut gapuna a kinamat daytoy ti biktima.
Addan ti biktima iti batog ti driver’s side ngem nagtultuloy nga immatras ti jeep agingga a natumba ken napandagan wenno naipit ti driver.
Maitaray kuma ti biktima iti ospital ngem kiniddaw ti pamilyana a maiyawid daytoy iti pagtaenganda gaputa mamatida a pimmusayen daytoy.
Nagpaayab laengen dagitoy iti doktor a nangideklara a pimmusayen ti biktima.
