Agpatpataming iti pag-agasan ti driver ti motorsiklo a naaksidente iti sharp curve a paset ti Interior A, Balacbac Rd., Sto. Tomas Proper, Baguio City pasado alas nuebe ti rabii idi kalman.
Iti pannakiuman ti Bombo Radyo kadagiti otoridad, “conscious” itan ti biktima ngem saan pay a makatungtong a nasayaat.
Ti biktima ti motorsiklo ket agtawen ti 25, ken residente ti La Trinidad, Benguet.
Maibasar iti report ti kapulisan ken iti inisial nga imbestigasion dagitoy, pasang-at a paturong iti Marcos Highway ti driber ti motorsiklo idi nag-overshoot iti bangir a linia. Gapu iti daytoy, naidungpar ti motor iti left ti taxi a toyota.
Nagsagrap ti gasgas ti left side ti lugan partikular iti side mirror ken ruangan bayat ti motor ket nabettak ti wind shield visor ken panel gauge.
Saan pay met nga ammo nu manu ti gatad ti nadadael a lugan ken motor.
Iti pannakiuman ti kapulisan iti nakasaksi iti insidente, adda daytoy iti ruar tapno umisbo idi nakitan ti motor ken nag-overshot ti taxi a pasalog.
Sigun met ti kasinsin ti biktima, naginum ti biktima sakbay a pimmanaw daytoy.
Naamuan a ti motor nga inusar ti biktima ket kukua ti uncle daytoy.
Impeksa met ti nakayuman ti Bombo Radyo a mapasamak ti saritaan dagiti dua a partido seknan iti gatad ti nadadael.
Iti agdama, maur-uray paylaeng ti medical result ti biktima. | via Bombo Noveh Organo
