BAGUIO CITY – Pagyamyamanan dagiti drivers ken operators dagiti parapasahero a jeep ditoy Cordillera ti Service Contracting Program ti gobyerno babaen iti Land Transportation Franchising and Regulatory Board (LTFRB) nga addaan panggep a mangited ti insentibo kadagiti drivers dagiti parapasahero a lugan a naapektaran iti agdama a pandemya.
Iti interview ti Bombo Radyo Baguio, kinuna ni Rey Bacoco, presidente ti United Metro Baguio-Benguet Jeepney Federation a dakkel daytoy a tulong kadakuada.
Ti Service Contracting Program ket maysa kadagiti programa ti Bayanihan to Recover as One Act ken ditoy a maipaayan dagiti public utility vehicle drivers iti performance-based incentives.
Sagudayen ti programna a makaawat dagiti drivers wenno operators dagiti parapasahero a jeep ken van iti insentibo nga P11 tunggal kilometro bayat a kadagiti parapasahero a bus ket P23 tunggal kilometro.
Imbinglay ni Bacoco a ditoy Cordillera Region ket naipangruna dagiti jeepney drivers, partikular dagiti grupo a nangipilan ti aplikasyonda para iti consolidation dagitoy kas maysa a kooperatiba wenno korporasyon.
Dinakamatna nga iti grupoda ket posible nga inton Miyerkoles a pirmaanda ti kontrata iti nasao a programa tapnu maipaay metten ti sim card ken ti P4,000 a panggatangda iti smartphone nga aramatenda iti nasao a programa.
Immunan nga inlawlawag ti LTFRB a mabantayanda ti panagbiahe dagiti parapasahero a jeep babaen iti GPS ti smartphone tapnu makwenta ti insentibo a maawat ti maseknan a driver.
