Dry run ti modernized jeep para iti Cordillera, naisayangkat iti nagduduma a lugar ditoy lokalidad

BAGUIO CITY – Naisayangkat ti dry run para iti baro a class 2 modernized jeepney ditoy rehiyon Cordillera.

Maka-akomodar ti nasao a modernized jeepney iti 22 agingga 30 a pasahero.

Sigun met kenni Joseph Batingwed, maysa a manager ti Baguio-Benguet Transport Cooperative, panggepda a mangala iti 15 units ti modernized jeepney.

Kinunana a napintas ti nasao a modernized jeepney gaputa kabaelan dagitoy a tarayen dagiti saan a napintas a kalkalsada iti rehiyon.

Impettengna a saan a nasken nga agdanag dagiti drivers gaputa mabalin a maaramat ti nasao a modernized jeepney iti adu a tawen.

Kabayatanna, manarimaan metten ti panangaprobar ti LTFRB kadagiti ruta a mabalin a dalyasaten ti nasao a modernized jeepney.