BAGUIO CITY – Nailista ti sag-gaysa a bilang ti ipupusay gapu iti COVID-19 ditoy siyudad ti Baguio ken iti probinsya ti Benguet idi kalman, August 5.
Sigun kenni Mayor Benjamin Magalong, pimmusay ti pasyente a 65-anyos a lalaki a residente ti Irisan sakbay ti pangaldaw idi kalman.
Nailista met ti kaunaan nga ipupusay gapu iti nasao a sakit sadiay probinsia ti Benguet babaen iti 58-anyos a lalaki a residente ti Itogon, Benguet nga addaan ti dadduma a sakit.
Kabayatanna, iti alas singko ti malem idi kalman iti datus ti Department of Health-Cordillera, nailista ti 15 a kaso ti panagrekober manipud iti COVID-19 ken dagitoy ket 11 a pasyente iti Baguio City ken uppat a pasyente iti Benguet.
Nailista metlaeng ti siyam a baro a naberipikar a kaso ti COVID-19 iti rehion idi kalman a bukbuklen ti sag-tallo a pasyente iti Baguio City ken Kalinga, dua iti Benguet ken maysa iti Abra.
Iti agdama, dumanonen iti 342 ti pakabuklan a bilang ti kaso ti COVID-19 iti Rehiyon Cordillera a bukbuklen ti 208 a nakarekober, 6 a pimmusay ken 129 nga agpatpataming paylaeng kadagiti pagagasan.
