BAGUIO CITY -Natiliw ti dua a drug personalities iti nagsaruno a buy-bust operation nga insayangkat dagiti otoridad sadiay Mankayan ken La Trinidad, Benguet.
Immuna a natiliw sadiay Poblacion, La Trinidad idi kanikadua ti drug personality a nabigbig a ni Vincent Zaragoza Cuyopan Jr. alyas BJ, 32-anyos.
Nakumpiskar kenkuana ti dua a pakete ti maatap a shabu nga agdagsen ti maysa a gramo.
Simmaruno a natiliw sadiay Ambabag, Guinaoang, Mankayan idi kalman ti drug personality a ni Warren Dangpa Madanes Sr., 45-anyos, laborer, tubo ti Buguias,Benguet ken residente ita ti Gueday, Mankayan, Benguet.
Nakumpiskar kenkuana ti dua a pakete ti maatap a shabu nga agdagsen ti 1.78 grams ken aggatad ti nasurok P12,000.
Narekober pay iti ikotna ti naaramat a buy-bust money. Iti agdama, sumangsango da Madanes Sr. ken Cuyopan Jr. iti kaso a panaglabsing iti RA 9165 wenno ti Comprehenssive Dangerous Drugs Act of 2002
