Manamnama a mailukat iti publiko dagiti dua a fountains idiay Rose Garden, Burnham park inton Nobyembre bente sais iti alas sais iti malem
Daytoy ket kagiddan ti pannakaiturnoverna manipod iti organizer a nangidaulo ti pannakapabaru ken pannakapapintas ti parke.
Manamnama met ti panakaimatang ti publiko iti baru a disenyo ken itsura daytoy.
Sigun kenni Atty. Rhenan Diwas, mangidadaulo ti City Environment and Parks Management Office a masilawan dagitoy inton bigat.
Malaksid iti dayta, saan laeng a dagiti fountains ti na-rehabilitate.
Namulaan met laeng iti rosas ti parke ken naisimpa ti aglawlaw kas panagsagana iti Enchanting Baguio Christmas inton November 28 iti agdama a tawen.
Maipalagip a nabayagen a saan a nausar dagiti fountains kalpasan a nadadael dagitoy.
Kabayatanna, maal-allukoy ti publiko a makipaset iti pannakailukat iti nasao a parke kasta met a mapalpalagipan dagiti agturong iti nasao a lugar nga agbalin a responsableda iti panagbisita dagitoy
Kiniddaw met ni Atty. Diwas ti saan a panangibato dagiti tattao iti barya ken makan kadagiti naaramid a fish pond.
Inyunay-unay iti nasao nga opisial a responsibilidad iti amin ti panangpatalinaed a napintas ken nadalus dagiti parke iti siudad.
