Agtultuloy nga im-imbestigaran ti Bauko Municipal Police Station ti insidente ti panagtagbat a napasamak idiay Bebe, Monamon Sur, Bauko, Mt. Province itay laeng nabiit.
Iti interview ti Bombo Radyo, kinuna ni PCapt. Peter Apangcay, Information Officer ti Mt. Province Provincial Police Office nga adda ti dua a mannalon a pimmusay bayat a maysa ti agpapaimbag kalpasan a natagtagbat dagitoy ti senior citizen.
Nabigbig dagiti pimmusay a biktima a da Errol Clint Apola Zaparita, 30-anyos, taga-Buguias, Benguet ken Renato Cubalit Balunes, 54-anyos, taga-Quirino Province.
Nabigbig met ti agpapaimbag a biktima a ni Jolito Daganos Malinias, 48-anyos bayat a ti suspek ket agtawen iti 60-anyos a tubo ti Lubuagan, Kalinga.
Sigun kenni PCapt. Apangcay, magmagna ti umuna a biktima a ni Malinias idi killaat latta a tinagbat ti suspek usar ti buneng.
Nupay kasta, nabaelanna latta ti timmaray ken nagdawat iti tulong nga iti agdama ket agpapaimbag gapu iti nasagrapna a sugat.
Intuloy met ti suspek a nagna agingga a nakitana dagiti dua pay a biktima a da Zaparita ken Balunes ken dagus a tinagtagbatna dagitoy.
Gapu iti nakaro a dunor a nasagrap dagiti dua a biktima ket dagus a pimmusay dagitoy.
Dinakamat ni PCapt. Apangcay a saan a nakataray wenno nakalaban dagiti dua a biktima gapu ta saanda nga impagarup a matagbatda agsipud ta agiinnamo dagitoy.
Naiyawid metten ti bangkay dagiti pimmusay a biktima bayat nga iggem ita dagiti otoridad ti suspek.
Iti agdama ket dukduktaken pay dagiti otoridad ti motibo ti suspek.
