BAGUIO CITY – Naipaima iti kustodiya ti Department of Social Welfare and Development (DSWD) ti dua a menor de edad a nagaramat ti replica ti paltog iti panagtakaw dagitoy iti maysa nga establishemento sadiay Barangay Bulo, Tabuk City, Kalinga itay nabiit.
Immunan a naiturong iti istasyon ti pulisya ti dua a menor de edad kalpasan a nagaramat da ti gun toy tapno makatakaw ti uppat a ream ti sigarilyo manipud iti store ti maysa a gasoline station.
Sigun kenni PCOL. Peter Tagtag Jr., dadaulo ti Kalinga Police Provincial Office, daytoy ti kaunaan a kaso nga adda ti menor de edad a nagaramat ti replica ti paltog.
Nupay kasta, dinakamatna nga ado ti natiliw da a menor de edad gapu iti iligal nga aktibidad a nakairaman dagitoy kas ti panagtakaw, iligal a droga, panag-hold-up ken daduma pay.
Iti baet daytoy, impetteng ni PCol. Tagtag nga awan met ti nawanawanan dagitoy a grupo ti agtutubo wenno gangs nga agrikrikus tapno mangdangran iti padada nga agtutubo ken kadagiti natataengan.
Gapu iti daytoy, impaganetget ni PCol. Tagtag a napateg a mairaman dagiti ubbing kadagiti programa ti gobyerno kas ti information education campaign, orientation ken daduma payt tapno maguyogoy dagitoy nga agadal ken saan a mairaman iti iligal nga aramid.
