BAGUIO CITY – Nadangran ti dua a pasahero kalpasan a napandagan iti poste ti kuryente ti nagluganda a jeep a resulta ti panagreggaay ti daga iti kalsada sadiay Begis, Poblacion, Tuba, Benguet idi malem kalman.
Iti interview ti Bombo Radyo Baguio kenni Manuel Belit, driver ti nasao a jeep, adda sarsarunuenna a tallo a lugan idi killaat a nargaay ti daga ken nairaman a ginuyod dagiti kayo ti maysa a poste ti kuryente a naipandag iti lugan nga imanmanehona.
Gapu iti daytoy, nadangran da Angelli Jen Federico, 17-anyos, residente ti Poyopoy, Taloy Sur, Tuba ken ni Dominador Molina Gallema, 34-anyos, mannalon, residente ti Bawek, Taloy Sur, Tuba nga agpada a nagsagrap ti minor head injuries ken dagus a naitaray iti pagagasan.
Kinuna ni Belit a dumanon iti 25 ti pasaherona ken napilitan dagiti dadduma a nagnagna gapu iti napasamak.
Innayonna a naklaat dagiti pasaherona idi napasamak ti panagreggaay a nagresulta iti panagdardaras dagitoy a rimwar iti lugan.
Naamuan a gapu iti insidente ket naapektaran ti suplay ti kuryente iti sumagmamano a paset ti Tuba ken napasaran ti nailet a taray ti trapiko.
Nawaknitan metten ti nasao a kalsada babaen iti panagtitinnulong dagiti amin a maseknan nga stakeholders. (-with Bombo Brigitte Marcasi)
