![](https://img.bomboradyo.com/baguio/2021/03/faustino-aquisan-1.jpg)
BAGUIO CITY – Nagpositibo iti COVID-19 ti pimmusay nga ama ti Kabayan, Benguet.
Inwaragawag ti Public Information Office ti Kabayan LGU a nagpositibo iti COVID-19 ti dua a swab test results daydi Mayor Faustino Aquisan.
Maipalagip a pimmusay ti mayor gapu iti cardiac arrest iti pasado alas-dose ti pangaldaw idi kalman bayat nga adda daytoy sadiay Notre Dame de Chartres Hospital, Baguio City.
Dagus met a naipasidong iti cremation ti bangkay ti 61-anyos a mayor kas maitunos iti pagalagadan nga impaulog ti IATF kadagiti matmatay nga agpospositibo iti COVID-19.
Iti agdama, nakamassayag ti dapo daydi Mayor Aquisan iti maysa a chapel ditoy Baguio City sakbay a maiyawid sadiay Kabayan, Benguet ken maiturong iti pagtaenganda sadiay La Trinidad, Benguet para iti tabonna.
Naibilin metten ti mandatory home quarantine dagiti nakapulpulapol ti mayor manipud March 6 agingga March 19 bayat nga ur-urayenda ti assessment ken rekomendasyon dagiti Contact Tracing Team, Patient Management and Monitoring Team ken Diagnostic Team.
Daydi Mayor Aquisan ket advocate ti eco-tourism ken nangirugi kadagiti aktibidad ken programa tapnu maital-o ti panagdur-as ti turismo iti Kabayan, Benguet.