BONTOC, MT. PROVINCE – Pimmusay ti dua nga ubbing kalpasan a nalmes dagitoy iti Chico River idiay Sitio Cheppay, Bontoc Ili, Bontoc, Mt Province itay malem, Agosto 4, 2024.
Nabigbig dagiti biktima a da Chris Foman-eg Pangod Payocyoc ken Seth Paspas Pangod Comafay, agpada nga agtawen iti lima.
Maibasar iti report ti Bontoc Operations Center, nakaawatda iti awag manipud iti maysa a miyembro ti Bontoc Emergency Reponse Team, pasado alas tres itay malem.
Gapu iti daytoy, dagus a nagresponse ti Bontoc Emergency Operations Center kadwada dagiti nagduduma a maseknan nga opisina, family members ken community volunteers iti nakapasamakan ti insidente para iti search, rescue and retrieval operations.
Immuna a nakita ni Jason Ganisi Payocyoc ti anakna a ni Chris Payocyoc nu sadino dagus a naitaray daytoy iti Bontoc General Hospital ngem naideklara metlaeng a pimmusay.
Nasapulan met dagiti nagresponde ti bagi ti maysa pay a biktima a ni Seth Comafay ngem naideklara metlaeng daytoy a pimmusay.
Impeksa met ni Bontoc Mayor Jerome Chagsen Tudlong, Jr. ti pannakipagladingetna iti ipupusay ti dua a biktima.
