Nakaawat ti libre a bukel ti pagay manipod iti Department of Agriculture dagiti duapulo a mannalon idiay Barangay Guinzadan Central, Bauko Mt. Province, idi napalabas a bulan iti agdama a tawen.
Sigun kenni Melanie L. Lagasca, Agriculture Technologist iti Office of the Municipal Agriculturist, ti programa ket iti sidong ti Rice Competitiveness Enhancement Fund (RCEF) a programa ti Department of Agriculture (DA) nu sadinno, mangipapaay ti nasao nga ahensia iti maysa a sako ti libre a bukel ti pagay kas tulong kadagiti mannalon iti pagilian a marigrigatan gapu iti epekto kadagiti naglabas a didigra.
Sigun met kenni Victor Dao-asen, maysa a mannalon, dakkel a tulong kadakuada ti libre a bukel ti pagay.
Maipalagip nga impaganetget ti pannakabagi ti OMAg a dagiti maikari a maikkan iti gundaway nga umawat ti suplay ti bukel ti pagay ket dagiti mannalon nga addaan ti 1000 square meters a talon ken dagiti nakerehistro iti programa babaen iti RSBSA Enrollment Form a mabalin nga i-download iti portal ti Department of Agriculture.///Via Dennis Joseph II S. Milan, Local News Correspondent
