Agbalbalin a karit iti Commission on Elections-Baguio ti kinaado dagiti voting centers iti siudad.
Iti panakiuman ti Bombo Radyo kenni Atty. John Paul Martin, Election Officer ti Commission on Elections-Baguio, kinunana a gapu iti kinaado dagiti precinct ket posible nga agkurang dagiti personnel nga agiwaras kadagiti Automated Counting Machine.
Malaksid iti dayta, mangnamnama ni Atty. Martin nga awan ti makina nga agpalya tapno dagus a maitransmit dagiti resulta ken maideklara a dagus dagiti baro nga opisyales iti siudad.
Para ita nga eleksyon, kinuna ni Atty. Martin a ti Miru System manipud South Korea ti nangsupply iti Automated Counting Machine a maaramat inton Mayo 12, 2025.
Imbinglay met ti election officer iti siudad nga inapresyar dagiti mannursuro ti baro nga Automated Counting Machine gapu ta kinunada a daytoy ket mas nalaklaka a maaramat no idilig iti makina a naaramat idi napalpalabas nga eleksyon.
Iti sabali a bangir, kidkiddawen ni Atty. Martin kadagiti kandidato nga agipaay dagitoy iti notice no sadino ti kaipatungpalan iti campaign rallyda tapno mangipaayda iti security.
