BAGUIO CITY – Kukuwestionaren ni Atty. John Paul Martin, election officer iti siudad, no anya ti basaran ti pablaak seknan iti panakabigbig ti siudad ti Baguio kas election hotspot iti kaleppas a 2025 National ken local elections.
Daytoy ket kagiddan iti pablaak nga agwarwaras iti social media a mangipakpakaamo a ti siudad ti election hotspot iti ruar ti National Capital Region.
Iti panakiuman ti Bombo Radyo kenni Martin, kinunana nga awan met ti naaw-awat ti opisina daytoy a reklamo.
Malaksid iti dayta ket impettengna a saan met a basaran kas hotspot ti napasamak a brown-out, ti panagmalfunction dagiti uppat nga automated counting machine a dagus a nasukatan ken ti attidog a pila gapu ta daytoy ket paset ti proseso ti eleksyon.
Para iti obserbasyon ni Atty. Martin, ti napasamak nga eleksyon iti siudad ket naannayas nangruna ket ti siudad ti Baguio ti maysa a lugar a dagus a nakatransmit kadagiti resulta ti eleksyon.
Innayon ni Atty. Martin a ti nasao a damag ket saan a napintas gapu ta makaapektar daytoy iti amin nga election stakeholders, saan laeng a ti opisina ti Commission on Elections Baguio no diket pakairamanan ti lokal a gobyerno ti siudad, dagiti otoridad, dagiti botante ken daduma pay.
