BAGUIO CITY – Nagpalawag ti traffic enforcer seknan iti panangsitana iti maysa a motorista bayat ti panagdalyasatna bayat a nakasilaw ti green iti traffic light iti paset ti kalsada iti siudad ti Baguio.
Iti exclusive interview ni Bombo Jez Lapizar kenni Bensin Luis, Traffic Aide I ti Traffic Enforcement Unit, kinunana a naideploy daytoy iti paset ti kalsada ti Magsaysay Avenue paturong iti Session Road gapu ta nailet ti gunay ti trapiko iti nasao a lugar.
Innayona a nawaya ti kalsada a turturongen ti motorcycle rider ngem panggepna a palubosan dagiti lugan manipud iti sabali a lane a dumalyasat iti nasao a kalsada.
Ngem dimmalyasat daytoy rason a pinasardengna ti motorcycle rider iti igid ti nasao a kalsada.
Kinunana pay nga iti pagannurotan ti Land Transportation Office, kasapulan nga urayen ti senyas ti enforcer a mangimanmanehar iti trapiko nupay man adda ti traffic light iti panagdalyasat kadagiti kalkalsada.
Inaklonna a nangato wenno napigsa ti bosesna bayat ti panagsitana iti nasao a gundaway gapu ta naka-helmet ti rider.
Kabayatanna, kinuna met ni Police Lieutenant Colonel Zacharias Dausen, dadaulo ti Baguio Traffic Enforcement Unit, nga awan ti makitana a panaglabsing seknan iti inaramid ti nasao nga enforcer.
