BAGUIO CITY – Kinumpirmar dagiti mannalon sadiay Paoay, Atok, Benguet a minimal laeng ti epekto ti frost wenno andap kadagiti mulada a nateng.
Iti interbyu ti Bombo Radyo ken ni Edward Haight, maysa kadagiti mannalon iti nasao a lugar, kinunana a tallon nga aldaw a mapaspasaran ti frost nangruna iti parbangon.
Nupay kasta, kinunana a saan a naapektaran dagiti mulada gapu iti taktika nga ar-aramiden dagiti mannalon.
Inlawlawagna nga agimulmula dagiti mannalon kadagiti frost resistant a nateng kas iti carrots, radish, repolyo ken dadduma pay.
Innayonna a nakasursuron dagiti mannalon isut gapuna a sakbay pay a mapasaran ti andap ket nakasaganan dagitoy tapno saan a maapektaran dagiti mulada ken tapno adu latta ti maapitda.
Kabayatanna, inwaragawag ni Atok Mayor Raymundo Sarac nga agtaltalinaed nga umdas ti suplay ti nateng nga agtataud iti munisipyoda nga uray nangrugin a mapasaran ti andap sadiay.
Kinunana a saan unay a nakaro ti epekto ti andap kadagiti mula ken manageable ti sitwasyon nga uray agtultuloy ti nababa a temperatura.
Dinakamatna nga agtultuloy latta ti panagapit dagiti mannalon sadiay nangruna kadagiti mulada a patatas, replyo, carrots ken daduma pay.
Inlawlawag pay ti mayor a maysa a porsiento laeng ti naapektaran a mula sadiay Paoay, Atok gapu iti andap nangruna ta naka-adaptaren iti nasao a kondisyon dagiti mannalon sadiay ken addan ti wagas nga ar-aramidenda tapno saanda a malugi.
Imbalakad na kadagiti maseknan a mannalon nga iti kanito a madadael ti mulada ket dagus nga ireportda daytoy iti Department of Agriculture para iti financial assistance.
Inyapelana pay ti saan a dagus a panamati ti publiko kadagiti maipabpablaak iti social media a makapaspasar ti Atok iti nakaro nga epekto ti andap nangruna kadagiti mannalon.
