BAGUIO CITY – Sumangsango ita ti maysa a peke a recruiter iti kaso a large scale estafa gapu iti pananglokona iti tallo a balasang ditoy Baguio City.
Nabigbig ti suspek a ni Benjamin Victoria Sarmiento, 28-anyos, tubo ti Sto. Tomas, Batangas ken residente ti Salud Mitra, Baguio City.
Nabigbig met dagiti biktimana a da Mylene Rombaoa, 32-anyos, service crew; Virginia Vallo, 30-anyos, customer service representative ken ni Gelica Oligario, 23-anyos, house maid, bin-ig a balasang ken agpapada a boarders iti nasao a lugar.
Maibasar iti report ti pulisya, agab-abang dagiti biktima ken ti suspek iti maysa a boarding house ken nangidiaya ti suspek iti trabaho kadagiti biktima sadiay Paris, France.
Naamuan a manipud Hulyo agingga Setyembre ita a tawen ket nakadawat ti suspek iti pakabuklan a P319,000 manipod kadagiti tallo a biktima a para kuma iti panakaiproseso ti dokumento dagitoy sadiay Paris, France.
Nupay kasta, nadlaw dagiti biktima nga awan ti dokumento nga ited ti suspek kadakuada iti baet a nagbayadda iti dakkel a gatad.
Gapu iti daytoy, nagreklamo dagiti biktima iti pulisya ken sadiay a naisayangkat ti entrapment operation a nagresulta iti panakakemmeg ti suspek a peke a recruiter.
