Naideklara ti fire out itay laeng alas otso ti agsapa iti uram a napasamak sadiay MRR Queen of Peace Barangay, Baguio City.
Kinumpirmar daytoy ti Bureau of Fire Protection-Baguio babaen kenni Senior Fire Officer 2 Rudolfo Villanueva Jr.
Sigun kenni Villanueva, naireport ti uram kadakuada itay 5:29 ti agsapa.
Malaksid iti Bureau of Fire Protection-Baguio, timmulong metlaeng dagiti kameng ti Bureau of Fire Protection-La Trinidad ken Bureau of Fire Protection-Tuba tapno mapapartak ti panakasebseb ti nasao nga uram.
Timmulong metlaeng dagiti volunteers manipod 911, Sunshine ken Camp John Hay, dagiti water delivery trucks dagiti dua a water delivery company iti siudad, kasta met ti Baguio Water District.
Iti agdama, agtultuloy ti mapping ken imbestigasyon ti maseknan nga ahensya tapno maduktalan ti rason ken nagrugyan ti uram, kasta met ti danyos nga intunda daytoy.//Bombo Jez Lapizar
