Impakaammo iti Department of Health (DOH) a dumanon itan iti 655 ti pakabuklan a bilang dagiti firecrackers-related injuries iti intero a pagilian a napasamak kabayatan ti holiday season.
Iti datos ti nasao nga ahensya, 351 kadagiti biktima ket agtawen iti 19 agpababa ken amin dagitoy ket nagsagrap iti nagduduma a kita iti burn ken dunor.
Sigun pay iti ahensya, nakailista dagitoy iti 19 a kaso dagiti napukawan iti ima ken ramay nu sadino, 11 manipod iti nasao a bilang ket menor de edad.
Rimwar iti datos a dagiti kaubingan a biktima ket agtawen laeng iti maysa agingga uppat.
Kabayatanna, ti kita ti paputok a kaadwan a nakaigapuanan dagiti kaso ket saan pay a mabigbig dagiti otoridad gapu ta saanen a malagip daytoy dagiti biktima.
Nupay kasta, agtaltalinaed latta ti nasao a bilang a 20% a nababbaba ngem iti nailista nga 819 a kaso agingga idi December 2024 agingga January 2025.
