BAGUIO CITY – Natiliw ti maysa a food delivery rider iti buy-bust operation nga insayangkat dagiti operatiba ti Baguio City Police Office (BCPO) – Station 7 sadiay Rizal Park, Baguio City idi kalman.
Nabigbig daytoy a ni Renzo Caraan Valdez, 25-anyos, baro ken residente ti BGH Compound, Baguio City.
Nakumpiskar kenkuana ti maysa a pakete ti maatap a shabu.
Kabayatan ti panagkapkap dagiti pulis kenni Valdez ket nasarakan ti maysa a pakete ti maatap a marijuana.
Kinumpiskar pay dagiti otoridad ti cellphone ken motorsiklo nga inaramatna a nakitransaksion iti operatiba ti pulisya.
Narekober met iti ikotna ti naaramat a buy-bust money.
Iti agdama, sumangsangon ni Valdez iti kaso a panaglabsing iti RA 9165 wenno ti Comprehensive Dangerous Drugs Act of 2002. (-Bombo Brigitte Marcasi)
