Impeksa ni Senate President Francis “Chiz” Escudero a saan a prayoridad ti Legislative-Executive Development Advisory Council (LEDAC) dagiti addang a pannakaipangato ti inaldaw a minimum wage dagiti mangmangged.
Ti bersion ti legislated P200 wage hike a naaprobaran iti House of Representatives ket nangatngato ngem ti P100 nga inaprobaran ti Senado.
Sigun kenni Escudero, mapasamak ti bicameral conference apaman a maawat ti Senado ti kopia ti House bill a naipasa iti maikatlo ken maudi a pannakabasa idi Hunio 4.
Nupay kasta, saan pay a nalawag nu umannamong wenno saan ti Senado iti House bill wenno agkompromisoda iti gatad tapno saan a maapektaran ti ekonomia.
Kabayatanna, kidkiddawen dagiti labor groups a kas ti Partido Manggagawa ken ti Nagkaisa Labor Coalition tapno ti dagos a maisayangkat ti bicameral committee tapno makaaramid ti pinal a bersion ti panangngato ti sueldo.
Ti maudi nga aldaw ti sesion ti 19th Congress ti Kamara ken Senado ket inton laengen Hunio a trese.
