Naaprubaran bayat ti maikadua a panakaibasana iti Kamara ti gakat a mangimandato iti panakaipasidong iti regulasyon ti motorcycle-for-hire kas kadagiti motorcycle taxis ken motorcycle delivery services.
Iti bileg ti nasao a gakat, masapol a mairehistro iti Land Transportation Office(LTO) dagiti prangkisa wenno dagiti motor sakbay a makapag-operate dagitoy para iti nasao a serbisyo nu sadino, kasapulan metlaeng a masigurado ti roadworthinessda sakbay a mairehistro.
Karaman kadagiti masapol nga isubmitir dagiti agparehistro ti proof of Filipino citizenship, financial capacity, tax identification number wenno certificate of registration as common carrier, ken insurance coverage para iti panakadangran ti rider, pasahero, wenno siasinoman a mairaman,kasta met ti danyos a posible a mapataud nu mapasamak ti aksidente bayat ti operasyon.
Sigun pay iti nasao a gakat, rumbeng a maitunos iti fare structure nga ipaiyulog ti Land Transportation Franchising and Regulatory Board(LTFRB) ti singiren a pamasahe dagiti operator, maibasar metlaeng iti maangay a konsultasyon kadagiti daduma pay nga stakeholder ti nasao nga industriya.
Kabayatanna, mabigbig nga agpada a responsable ti operator ken motorcycle taxi platform provider wenno online e-commerce platform provider kaspangarigan mapasamak ti aksidente a makaitunda ti ipupusay ken panakadangran dagiti indibidwal, kasta met ti posible a panakadadael dagiti kagawaan.
