Naipila iti Senado ti gakat a mangipawil kadagiti kindergarten agingga senior high school students ken manursuro iti amin a parapubliko ken pribado a pagadalan manipod iti panagusar ti “mobile phones” ken “gadgets” bayat ti oras ti panagadal.
Ti Senate Bill 2706 wenno ti singasing nga Electronic Gadget-Free Schools Act ket impila ni Senate basic education committee chairman Sherwin Gatchalian.
Nakaland iti singasing ti negatibo nga epekto ken kanayun a panagusar ti “mobile devices” iti “performance” dagiti studiante.
Iti sidong ti maisingsingasing nga addang, amin nga studiante ket saan a mapalubusan nga agaramat ti cellphone ken dadduma nga “electronic gadgets” iti uneg ti pagadalan bayat ti panagiskwela dagitoy.
Karaman kadagiti lugar ti pagadalan (school premises) iti Senate Bill 2706 ket dagiti siled-pagadalan, laboratorio, banio, gymnasium, kantina wenno kapeteria,school club rooms, paglangoyan (swimming pools), salas dagiti mannursuro, ken opisina ti eskuelaan.
Maiparit met dagiti mannursuro ken miembro ti faculty nga agusar kadagiti gadget-da bayat ti naituding nga oras ti panangisuroda kadagiti siled-pagadalan.
Ti panagusar kadagiti gadget ket maipalubos laeng mainaig kadagiti panagadal ken dadduma pay.
Iti Senate Bill 2706, naimandato iti Department of Education nga agaramidda ti “guidelines” iti panangipawil ti panagusar ti “mobile devices” ken “electronic gadgets” kasta met iti pribado a pagadalan.
Dagiti saan nga agtulnog ket maipaayan ti kaskenan a pannusa nga ipataw ti Depaertment of Education kadagiti parapubliko ken pribado a pagadalan.
Kasta met a maipasidong dagiti studiante kadagiti maitutop a pannusa a naited kadagiti paglintegan ti pagadalan kas inkeddeng ti DepEd.
