Maisingsingasing ti maysa a gakat a panggepna a gudwaen iti dua ti distrito iti Benguet.
Impila daytoy ni Benguet Congressman Eric Go Yap iti 20th Congress.
Ti House Bill 7393, a napauloan iti “An act providing for the reapportionment of the lone legislative district of the province of Benguet into two legislative districts”, ket panggepna a gudwaen ti probinsia iti dua a legislative districts tapno mapapigsa pay ti representasion ken mapapartak iti panangipaay iti serbisio kadagiti umili.
Maibasar iti dokumento a maimatangan iti website iti Kongreso, ti umuna a distrito ket dagiti munisipyu iti Sablan, Tuba, Itogon, Bokod, ken Kabayan bayat a ti maikadua a distrito ket buklen met iti La Trinidad, Tublay, Kapangan, Atok, Buguias, Mankayan, Bakun, ken Kibungan.
Maipalagip a sipud idi naibangon ti Benguet idi tawen 1966 iti sidong iti Republic Act No. 4695, wenno ti “Subdivision Law of Mt. Province,” sangapulo ket tallo a munisipyu iti probinsia ti ibagi ti maymaysa a mammanday-linteg.
Iti panaglabas iti panawen, ti panagdakkel iti populasion ken dagiti bantay iti probinsia ket nangitunda iti karit iti nasayaat a panangidanon kadagiti komunidad ken panangrisut iti kasapulanda.
Sigun kenni Yap, ti singasing ket kas sungbat kadagiti karit, babaen iti pannakaadda iti dua a “representative” wenno pannakabagi nga agtinnulong tapno mapasayaat pay ti panangrisut kadagiti lokal a pakaseknan ken maiyasideg ti napateg a serbisio kadagiti tattao.
