Posible a saanen mapilaan ti kriminal a kaso ti driver ti Black Strada a nakadungpar iti road signage iti paset ti Magsaysay Avenue, Baguio City idi parbangon ti Lunes, May 13.
Iti panakiuman ti Bombo Radyo kenni Police Lieutenant Colonel Zacharias Dausen, dadaulo ti Traffic Enforcement Unit ti Baguio City Police Office, nakikoordinardan iti City Engineering Office seknan iti gatad a rumbeng nga i-settle ti driver kasaruno metlaeng ti panagreport daytoy iti opisina ti traffic enforcement unit idi metlaeng kalman.
Sigun kenni Dausen, nasarakanda ti plaka ken nabigbigda driver daytoy babaen iti panangbacktrackda kadagiti CCTV footge iti Central Business District ken babaen metlaeng iti panakikoordinarda iti Land Transportation Franchising and Regulatory Board(LTFRB).
Inlawlawag ni Dausen a saanen maipila ti kaso iti nasao a driver laketdi adda ti kooperasyon daytoy nga ipaay ti pagrebbenganna kadagiti naperdina.
Maur-uray payleng met ti komento ti City Engineering Office iti nasao a pakaseknan.
Iti benneg ti traffic enforcement unit, pinaayanda ti driver ti traffic violation a reckless driving ken panakairamanna iti Vehicular Traffic Accident.
Kabayatanna, awan met ti nadangran nga indibidwal idi napasamak ti nasao nga insidente.//Bombo Rob Dominguez
