Ngimmato ti pondo a nailatang para iti General Services Office para ita a tawen nu sadino, agdagup daytoy iti agarop Php600million.
Iti panakiuman iti Bombo Radyo kenni Eugene Buyucan, dadaulo iti General Services Office-Baguio, kinunana a nangatngato ti nailatang a pondo para iti 2025 gapu kadagiti nagduduma a factors kas iti panakaipangato iti maipasahod kadagiti empleyado iti nasao nga opisina.
Malaksid iti dayta, dinakamat ti opisyal a maysa pay kadagiti rason ket ti agtultuloy a panagngato iti populasyon iti Baguio City gapu ta naobserbaran nga adu latta dagiti sumangsang-at nga agnaed iti siudad kasta metten dagiti estudyante nga umay agadal.
Sigun kenkuana, kagiddan ti panagado iti tao iti Baguio City, umado met dagiti mapataud a basura.
Innayonna nga iti agdama ket agtultuloy latta a mapsaspasaran ti panagngina dagiti sumagmamano a kasapulan para iti maintainance dagiti ar-aramantenda a truck.
Nupay kasta, awan pay ti dinakamat ti opisyal a makitkitana a permanente a solusyon para iti panakarisut kadagiti pakaseknan a mainaig iti basura.
Mainaig iti dayta, imbinglay ni Buyucan nga adda ti gatangenda nga innem a kanayunan a garbage truck ken dua a babassit ita a tawen nga inaprubaranen iti city council ken ti local finance.//Bombo Rob Dominguez
