BAGUIO CITY – Agtultuloy ti ipatpatungpal nga imbestigasion dagiti kameng ti Baguio City Police Office Station 7 ken ti Bureau of Fire Protection-Baguio iti panakauram ti Giant Christmas Tree a naipasdek sadiay Rose Garden idi rabii.
Maibasar iti inisial a report, nakaawat iti awag ti BFP-Baguio manipod iti maysa nga empleado iti asideg a Hotel sadiay Otek Street a nangipakaammo a maur-uram ti nabatbati nga istraktura ti Giant Christmas Tree.
Iti imbestigasion ken panag-responde dagiti kameng ti BFP, mapattapatta a nangrugi ti uram iti alas otso singkwenta ken naideklara ti “fire out” iti agarop alas nuebe dies ti rabii nupay nauram ti sibubukel nga istraktura.
Maibasar pay iti inisyal nga imbestigasion, maatap nga adda ti nangsindi iti nasao a Christmas Tree isut gapuna nga ikagkagumaan dagiti otoridad a kitaen nu adda ti nakamuntar a CCTV camera iti nasao a lugar.
Kabayatanna, saan met a masigurado dagiti agbambantay a security guard nu adda pay laeng ti suplay ti kuryente iti Christmas Tree gaputa sigun kadagitoy, rinugian nga innikkat ti maseknan nga opisina dagiti dadduma a dekorasion iti nasao a parke.
