Madama nga agpatpataming ti agtawen tallo pulo ket lima(35) a lalaki a taga Bayyo Bontoc, Mountain Province kalpasan a kinagat daytoy ti green pit viper wenno ti maaw-awagan a “ngongoy” idi malem ti Sabado, May 4.
Sigun iti report, saan a napakadaan ti lalaki ti kaadda ti nasao a klase ti uleg iti karuutan a paset ti igid ti karayan a nagturunganna a pagkalapan.
Tinuklaw ti ngongoy ti kanigid nga ima ti lalaki. Dagus a naobserbaran ti napartak a panagwaras ti gita iti bagi daytoy nu sadino, limteg ken nakarikna ti lalaki ti panagdagsen ti nakagat nga ima daytoy.
Dagus met a naiturong daytoy sadiay Luis Hora Regional Memorial Hospital para iti panakatamingna.
Immuna metten a kinagat ti kapada metlaeng a klase ti uleg ti maysa pay a mannalon idi panawen ti pandemya iti met paset ti Kawanban-ang iti isu metlaeng a lugar.
Gapu iti dayta, maipalpalagip iti publiko ti panagridam ken panagsipot dagitoy iti aglawlawda nangruna ta iti agdama ket naobserbaran ti panagruar dagiti daduma pay a klase ti uleg kas epekto dagiti napaspasaran a panakauram dagiti kabanbantayan.
