BAGUIO CITY – Nakanselar ti naituding a grand opening parade inton bigat, February 1 ti nalatak ken mapadpadaanan a Baguio Flower Festival wenno Panagbenga 2020.
Inwaragawag daytoy ni Baguio City Mayor Benjamin Magalong kas paset ti proactive measures ti lokal a gobyerno kontra iti pangta ti 2019 novel coronavirus.
Nupay kasta, awan pay ti pinal a disisyon seknan iti dua a highlights ti Panagbenga, partikular ti Grand Street Dance Parade ken Grand Float Parade.
Kinunana a makanselar metlaeng ti naituding a CARAA Meet 2020 ken maiyakar inton kalgaw.
Karaman pay a kinanselarna ti pedestrianization ti pasang-at a kalsada ti Session Road tunggal Dominggo ken dagiti dadakkel nga aktibidad a maisayangkat ditoy siudad kadagiti masungad a tallo a lawas nangruna dagiti mangguyugoy iti adu a turista wenno tattao.
Insanodna met ti pammilinna para iti panakakanselar ti klase iti tertiary level inton bigat.
Innayon ti mayor a mangbukeldan iti task force kas maitunos iti pammilin ti DILG tapnu adda agaksion iti isyu ti coronavirus ken mapasayaat pay iti proactive measure ti siudad iti nasao a virus.
Linawlawaganna pay a saan a mairikep ti Baguio wenno awan ti maisayangkat a lockdown iti siudad isut gapuna a mabalin latta a sumarungkar iti Baguio dagiti sangaili ken turista.
