BAGUIO CITY – Maipaspasidong itan iti social intervention ti grupo t dagiti indibidual a karaman iti rambulan a napasamak iti parbangon ti Domingo, Disiembre 19 sadiay Lower Session Road, Baguio City.
Iti interview ti Bombo Radyo Baguio, dinakamat ni Baguio City Police Office Community Affairs & Division Unit (BACPO-CADU) Chief PLt.Col. Judy Jasmin Palicos a naiyuman ti nasao nga insidente iti Women and Children Protection Desk ti BCPO Station 7.
Sigun kenkuana, uppat a menor de edad ken dua pay nga agtutubo nga agtawen iti 21 ken 26; bin-ig a residente ti siudad ti karaman iti nasao nga insidente.
Maipalagip a nagwaras iti social media ti video ti panagdidinnanog ken panagkikinamat ti dua a grupo agingga nga adda ti naidasay iti kalsada.
Naamuan bin-ig nga adda iti impluwensiya ti arak dagiti agtutubo a nagresulta iti riot.
Dagus a naayaban dagiti nagannak ken guardians kasta metten dagiti social workers a nakadesignar iti pagananaedan dagiti menor de edad.
Naipasidong iti medico legal dagiti nadangran iti insidente.
Iti imbestigasion dagiti pulis, agam-ammo dagiti agtutubo ken nagtaudda iti maysa a bar establishment ditoy siudad.
Nagkedked met a nangipila iti kaso dagiti nadangran isu’t gapuna a napaawid metlaeng dagiti dua nga adulto.
Sigun pay iti opisyal, agtultuloy ti panagsukimatda iti establisihimento a nagtaudan ti grupo gaputta adda ti pakasungbatan daytoy iti paglintegan ti siudad partikular ti panaglabsingda iti curfew hours ken ti panangiserbida iti arak kadagiti menor de edad.
Kinunana a sumagmamano kadagiti establishimento ti agrikep no agpatrolya dagiti pulis ngem aglukat metlaeng dagitoy ni nakapanawen dagiti otoridad.
Dinakamatna a limed a mangiserserbidaiti arak iti uneg ti establishimento uray pay nagleppasen iti curfew hours.
Inlawlawagna pay a responsibilidad dagiti nagannak wenno guardians dagiti menor de edad ng aglabsing kadagiti paglintegan ti siudad gaputta maitunos daytoy iti ti Special Protection of Children Against Abuse, Exploitation and Discrimination Act.
Iyap-apelana pay kadagiti nagannak ti panagbantayda kadagiti annakda nangruna ita nga napalukayan dagiti restriksion mainaig iti COVID19 pandemic.
Kabayatanna, pinaglibakan ni Palicos ti maatap a saan a dagus a panagresponde dagiti otoridad iti napasamak nga rambolan.
Inkalintegan dagiti maseknan a pulis a manarimaan ti panagpatrolyada iti Upper Session Road isu’t gapuna a saanda a dagus a narespondean ti insidente.
Inlawlawagna met nga awan ti naduktalanda a miembro ti aniaman a gang wenno fraternity kadagiti indibidual a karaman iti napasamak a rambolan.
