Nasermonan ti grupo dagiti media manipod kenni United States Secretary of Defense Pete Hegseth idi kalman gapu iti mapapati a panangiwarasda kadagiti saan a pudno nga impormasion maipapan iti saan a naballigi a mision ti Amerika a dadaelen ti nuclear sites ti Iran.
Impaganetget ni Hegseth kadagitoy a ti panangraut ti Amerika kadagiti nuclear facilities ti Iran ket maysa a pakaistorian nga operasion nga addaan panggep a lapdan ti lumawlawa nga impluensia ti Iran kadagiti nuclear weapon.
Kinuna daytoy ti nasao nga opisial bayat ti press briefing idi kalman iti Pentagon.
Iti sabali nga statement, kinuna met ni CIA Director John Ratcliffe a nakaurnong ti ahensia iti “credible evidence” seknan iti nakaro a pannakadadael kadagiti nuclear facility ti Iran gapu iti panagbomba ti Estados Unidos.
Kabayatanna, nagpalagip met ti gobierno ti Amerika iti nainget a panangibinglayda ti classified information iti Kongreso kasaruno ti mapapati a panangiwaras iti sensitibo a datos.
