BAGUIO CITY – Binigbig ti National Historical Commission of the Philippines (NHCP) ti historical value ti Philippine Military Academy (PMA).
Indauluan ni NHCP Acting Executive Director Ludovico Badoy ti unveiling ceremony ti historical marker ti PMA kadwana ni Lieutenant General Ronnie Evangelista, ti PMA Superintendent.
Mandato ti NHCP ti mangital-o iti pakasaritaan ti Pilipinas babaen kadagiti museums, research ken publications ken panangipreserba iti historical heritage babaen iti konserbasyon ken panagmarka kadagiti napnuan pakasaritaan a lugar ken istruktura iti pagilian.
Sigun kenni PMA acting information chief Reynan Afan, idi pay napalabas a tawen ti aplikasyonda iti NHCP para iti panakaideklara ti historical value iti Marcelo Hall, Borromeo Field ken Sundial ti akademya.
Naamuan a ti Marcelo Hall ti kaunaan nga istruktura nga impasdek dagiti Amerikano idi 1950s kagiddan ti panakaipasdek ti hallowed grounds ti Borromeo Field bayat a naipasdek ti Sundial idi 1957.
Kinuna ni Afan a nagdesisyon ti NHCP nga ideklara ti pakabuklan ti akademya kas historical site isut gapuna a naipasdek ti historical marker iti main gate ti PMA.
Mabasa iti marker ti pakasaritaan ti PMA manipud idi 1905 sadiay Intramuros, Maynila agingga a naipasdek iti agdama a lokasyonna sadiay Fort General Gregorio del Pilar, Loakan, Baguio City.
