Panangpataud kadagiti world champions, tarigagay ti kaunaan nga Igorot Brazilian Jiu Jitsu Blackbelt rason a tinalikodanna ti trabahona kas military nurse
Nagserbi kas maysa a military nurse idiay Bahrain ngem nagbaliw ti amin idi nasarakanna ti passionna iti tay-ak ti ay-ayam partikular iti Jiu Jitsu.
Isuna ket ni Gibran Langbayan, ti kaunaan nga Igorot Brazilian Jiu Jitsu Blackbelt a tubo ti Buguias, Benguet ken Tadian Mt. Province.
Isuna ket anak da Ireneo Langbayan ken Cristita Langbayan manipud Loo, Buguias, Benguet.
Nagturpos ni Langbayan iti Bachelor’s Degree in Nursing iti Benguet State University idiay La Trinidad, Benguet idi 2007.
Nakaala metlaeng daytoy iti Professional Regulation Commission (PRC) license idi kapada a tawen.
Iti interview ti Bombo Radyo Baguio, imbinglay ni Langbayan a nagturong daytoy idiay Bahrain idi 2012 ken nagserbi kas military nurse iti las-ud ti sangapulo a tawen.
Nupay naragsak daytoy iti napilina a trabaho, inaklonna nga stressful ti panagserbina kas nurse.
“[Dagidiay pasyente ket] puro critical amin… isunga stressful…masapul i-manage mo [a nasayaat]. Considering a dagidiay pasyente mi paylaeng ket puro military families [ken] royal families.”
Tawen 2013, nasursurona ti ay-ayam a jiu jitsu babaen iti katrabahoanna ken isu metten ti nagbalin kas stress reliever ti bagina.
“Stressful ang pagiging nurse… isunga kinayat ko metlang ti jiu jitsu ket diyay diay way mi nga ide-stress diay bagi mi after diay trabaho.”
Ditoy metten a nangrugi a nakipaspaset ni Langbayan iti nagduduma a jiu jitsu competition iti pagilian a Pilipinas, Bahrain, United Arab Emirates, England, Estados Unidos ken nakaibulsa iti ado a medalya.
Gapu iti panagayatna iti jiu jitsu, nagdesisyon ni Langbayan a panawan ti trabahona kas military nurse tapno agpokus iti tay-ak ti ay-ayam.
Nagawid daytoy iti pagilian a Pilipinas tapno agpataud kadagiti atleta nga agbalin kas world champions.
“Mas passionate ak idiay jiu jitsu and being active as an athlete and teaching. Kasi idi naalak diay brown belt ko, I’ve been teaching sa isang gym idiay abroad.”
Nagserbi ni Langbayan kas life-saver iti sabali a pagilian ken panawen metten tapno pagserbianna ti pagilian a Pilipinas.
Iti agdama ket agisursuro ni Langbayan iti Brazilian Jiu Jitsu iti maysa a gym iti Baguio City.//Bombo Genzel Depayso
