Manarimaan ti imbestigasyon dagiti kameng ti Tuba Bureau of Fire Protection iti napasamak nga uram idiay Main camp, Philex Mine Padcal, Camp 3 Tuba Benguet idi April 16.
Sigun kenni Senior Fire Officer 3 Ian Sungduan- chied operations ti BFP- Tuba, nakaawatda iti impormasyon manipud iti MDRRMO office nga adda ti uram ken adda metten ti statement manipud constituents.
Nupay kasta, kasapulan a maberipikar ken maibestigaran.
Maibasar iti panagsukimat dagiti otoridad, dumanon iti agarup 500 sqm. ti kalawa ti nauram.
Ti nasao a pasdek ket maar-aramat kas apartment building dagiti engineers ken medical staff ti Philex mines.
Maibasar iti report, naipakaamo kadagiti otoridad ti uram iti pasado 11 p.m a nangitunda ti dagus a panagresponde dagitoy.
Naaramid iti light material ti pasdek a nangitunda iti dagus panagramaram ti uram.
Sigun kenni FO3 Sungduan, 17 a pamilya ti naapektaran iti nasao nga insidente.
Nupay kasta, awan ti nadangran iti napasamak nga insidente.
Naideklara a fire out iti 1:20 a.m babaen iti tulong ti BFP Baguio, Fire Brigade ti Philex mines, Sunshine firetruck, PMA ken Tuba MPS.
Maibasar iti imbestigasyon ti kapulisan, naobserbaran ti 47-anyos a babae ti asok manipud iti back door ti kuarto ti maysa a pamilya.
Sinukimat ti anakna no sadino, ditoy metten a nakitana ti panagramaram ti uram a nangapiktar iti 13 a rooms ti nasao bunkhouse.
Iti kanayunan nga imbestigasyon dagiti kapulisan, maysa a babae ti nangibaga a nakangngeg iti uni manipud iti mapapati nga electric wire explosion manipud iti kusina.
Ditoy metten a naangotda ti asok manipud ti plastic ken rubber materials agingga a nagwaras.
Iti agdama, temporaryo nga agnanaed iti smith hall ti kompanya dagiti apektido nga indibidual.
Naipaayan metten daytoy iti tulong manipud iti nasao a kompanya, Local Government Unit (LGU), Office of the civil defense (OCD), probinsiya ti Benguet, regional office ken dadduma pay.
Kabayatanna, agpalpalagip dagiti kameng ti BFP a kanayun nga agannad tapno maliklikan ti kapada nga insidente.//Bombo Noveh Organo
