BAGUIO CITY – Impasigurado ti Philippine Drug Enforcement Agency-Cordillera ti agtultuloy nga implementasyon dagiti programa ti ahensia tapnu magibusan ti panagwaras dagiti iligal droga.
Iti interview ti Bombo Radyo Baguio kenni PDEA Cordillera Regional Gil Castro, inlawlawagna ti waragawag ni PDEA Director General Wilkins Villanueva a nangato ita ti demand ken supply ti marijuana iti pagilian.
Sigun kenkuana, adu kadagiti drug ushers ken pushers ti shabu ti nag-shift iti marijuana kalpasan dagiti nagduduma nga restrictions iti National Capital Region ken iti Regions 3 ken 4.
Rumrumwar pay nga iti amianan a a Luzon ti karaman a pagtataudan ti supply ti marijuana .
Gapu iti daytoy, matuttutukan ti Supply Reduction Campaign wenno programa dagitoy a mangdadael iti pagmulmulaan ken pag-apapitan kadagiti iti marijuana tapnu malapdna ti panagwaras ti supply iti drug market.
Karamanen kadagiti naballigi nga operasyon ditoy Cordillera a paset ti programa ti rinibribo a gatad ti marijuana a nauram ken nadadael kadagiti plantasyon sadiay Kalinga, Mt. Province ken Benguet a pakairamanan ti Oplan Herodotus a nakadadaelan ti nasurok P502-M a gatad ti marijuana ken ti Oplan Marites a nakadadaelan met ti P15-M a gatad ti marijuana.
Impeksana a makapa-alarma ita ti damag a nangato ti supply ken demand ita ti marijuana ngem agtultuloy met dagiti addang nga ar-aramiden ti ahensia tapnu maikkat dagiti daddakel a gatad a mailako iti drug market tapnu maksayan ti nakaru a panagwaras ti nasao iligal a droga.
