BAGUIO CITY – Pagsagsaganaan ita ti rehiyon Cordillera ti epekto ti El Niño weather phenomenon a manamnama a mapasaran inton sumaruno a tawen.
Maibasar iti Advisory ti PAGASA idi Nobyembre 9, dumanon iti innem a pulo ket lima a probinsiya iti pagilian ti posible a maapektaran ti El Niño.
Manipud iti nasao a bilang, innem ditoy ket manipud iti rehiyon Cordillera pakairamanan ti Kalinga ken Apayao a makapasar ti dry spell ken Abra, Ifugao, Mountain Province ken Baguio-Benguet a makapasar ti dry conditions inton Pebrero 2024.
Iti pannakiyuman ti Bombo Radyo kenni Jonathan Llanes, Information Officer ti RAFIS iti Department of Agriculture (DA) – Cordillera, nangipaayen ti ahensiya ti nagduduma nga intervention supports kadagiti mannalon.
Karaman ditoy ti water impounding facilities ken equipments a maaramat kadagiti plantation sites wenno kadagiti kataltalonan.
Malaksid iti daytoy, kinuna ni Llanes nga agtultuloy ti addang nga ipatpatungpal ti Cordillera Regional Inter-Agency Task Group (RIATG) on El Niño nga idauloan ti Department of Agriculture Cordillera (DA-CAR), task unit ken nagduduma nga agency task groups tapno mataming dagiti posible nga epekto ti El Niño iti rehiyon.
Impeksa pay ni Llanes a manarimaan ti panangtarimaanda kadagiti irrigation system a nadadael kadagiti naglabas a bagyo ken agbirbirukda metlaeng ti dadduma a water source kas ti deep-wells ken dadduma pay.
Imbalakad pay ti nasao nga opisyal kadagiti mannalon nga agmulada kadagiti nateng a maibagay iti panawen ti El Niño tapno saan a madadael ken masayang ti mula dagitoy.//Marinel Rodrigo
