Agparparang a maysa kadagiti dadakkel a banag tapno agballigi ti maysa a bunggoy iti ay-ayam a basketball partikular iti National Basketball Association(NBA)playoffs ti maipanamnama nga insentibo kadagiti players.
Iti panakiuman ti Bombo Radyo kenni Manny Kiwas, maysa a local sports analyst, ad-adda nga agregget dagiti players ti maysa a bunggoy nu daddakkel ti insentibo nga ipanamnama kadakuada ti management kaspangarigan agballigi dagitoy.
Sigun kenni Kiwas, napigsa iti agdama ti pwersa dagiti bunggoy ti Denver Nuggets ken Minnesota Timberwolves nu sadino, kinabaelan payen dagitoy nga abaken ti bunggoy dagiti nalalatak a players ti nasao a liga kas ni Lebron James ti Los Angeles Lakers nga inabak ti Denver Nuggets iti mananrimaan a Western Conference Playoffs.
Innayon ni Kiwas a posible nga in-inuten a bumaba ti karera dagiti immunan a nabigbig kas basketball stars kagiddan paylaeng ti panakipaay ti oportunidad kadagiti sumarsaruno nga henerasyon.
Kabayatanna, dinakamat ni Kiwas a dakkel ti potensyal ti Minnesota Timberwolves nga agbalin kas basketball superstar laketdi makaala ti management ti nalalaing a miembro daytoy.
Kasaruno paylaeng dayta ti naobserbaran a napintas a performance ti nasao a bunggoy kontra iti Denver Nuggets bayat ti Western Conference Playoffs nu sadino, nagtabla dagiti iskor dagitoy iti parikular a round.
Nupay kasta, kinuna ti sports analyst a saan a kaskarina nga agpaabak ti bunggoy ti Denver Nuggets nangruna ta dagitoy ti agdama a kampeon iti National Basketball Association(NBA) league rason nga addaan dagitoyen ti championship experience.//Bombo Rob Dominguez
