BAGUIO CITY – As-asikasuen ita ti lokal a gobierno ti Baguio City ti panakaipaay ti insentibo kadagiti opisial ti barangay nga agserserbi a frontliners iti pananglaban iti coronavirus disease (COVID 19).
Iti interview ti Zona Libre ti Bombo Radyo Baguio, inyunay-unay ni ABC President ken Councilor Michael Lawana a masapul a maipaayan iti kanayonan a tulong dagiti opisial ti barangay gapu iti kinadelikado ti trabaho dagitoy ita a panawen ti pandemic.
Kinunana a kiniddawda ken ni Mayor Benjamin Magalong ti pannakaipaay ti hazzard pay kadagiti opisial ti barangay.
Nupay kasta, kinunana a food allowance pay laeng ti maipaay kadagiti opisial ti barangay ken maisimsimpa pay ti pannakaipaay ti tulong kadagitoy.
Mainaig iti daytoy ket kiniddaw ni Lawana ti pannakaawat dagiti umili kadagiti opisial ti barangay.
Inaklonna a daytoy a mismo ken dagiti dadduma nga opisial ti barangay ket makaaw-awat iti adu a pammabalaw ken adu dagiti dakes a pannarita a maisawsawang kontra kadakuada iti personal man ken iti social media.
Inballaag ni Lawana ti pannakaipila ti kaso kadagiti indibidual a mangpangpangta ken mangbabbabalaw kadagiti opisial ti barangay apaman a malpas ti enhanced community quarantine.
Nupay kasta, kinunana a makasuan met laeng dagiti opisial ti barangay nga agar-aramid iti maikaniwas ita a panawen ti krisis.
