Patien ti dadaulo ti Department of the Interior and Local Government (DILG) a ni Interior Secretary Juanito Victor Remulla a ti panagadu ti bilang dagiti krimen ket gapu iti naglabas nga administrasion, kagiddan ti panangilibak ti Malacañang a ngumatngato ti crime rate iti pagilian.
Sigun met kenni Police Brigadier General Anthony Aberin, National Capital Region Police Office (NCRPO) director, bimmaba ti insidente ti panagtakaw kasta metten iti panagrames, murder, homicide ken physical injuries iti agarup 1,000 manipod idi Enero a uno agingga sangapulo ket uppat nu idilig iti agpada a panawen idi 2024.
Nupay kasta, inaklon ti nasao nga opisial a ngimmato bassit ti carnapping.
Iti baet ti nasao a bilang, adda dagiiti impormasion nga agwarwaras iti social media a ngimmato ti bilang ti insidente iti pagilian, ngem pinaglibakan ti Malacañang dagiti alegasion.
Sigun kenni Remulla, ti impormasion seknan iti panangngato ti crime rate iti Pilipinas ket inaramid dagiti tattao a konektado iti administrasion ni sigud a President Rodrigo Duterte.
Kinunana a dagti trolls ti naglabas ti naglabas nga administrasion ti mangiruruar a ngumatngato ti krimen, ken kinunana a linlinisanda laeng dagiti “gulo” nga imbati ti naglabas nga administrasion.
Kas sungbat, kinuna met ti sigud a presidential chief legal counsel a ni Salvador Panelo a saan a kasapulan ti Duterte administration ti internet trolls gaputa nangato ti trust and approval rate, saan a kas iti agdama nga administrasion a kasapulan ti trolls tapno mapasayaat ti imahena ken mang-atake pay iti naglabas nga administrasion.
