Agpatpaming ita dagiti sangapulo ket pito nga indibidual iti pag-agasan idiay Tabuk City, probinsia ti Kalinga.
Kasaruno ti pannakadangran dagitoy kalpasan a naawanan ti preno ti naglugananda a jeep itay laeng agsapa, Hunio 22, iti agdama a tawen.
Iti pulis report, nagtaud ti jeep manipod Uma, Lubuagan, Kalinga ken paturong kuma daytoy idiay Tabuk City a sakay dagiti sangapulo ket pito.
Iti panangilawlawag ti dadaulo ti kameng ti pulisia, idi nakadanon ti jeep iti pabababa a paset ti dalan idiay Balangabang, Dangoy, naawanan ti preno ti jeep isut rason a naawanan ti kontol ti drayber iti jeep a nagresulta met iti pannakatumba daytoy.
Kabayatanna, manipod iti sangapulo ket pito nga indibidual, sangapulo ti nakaro a nadangran.
Nabigbig daytoy a da Melissa Tuclab, Loren Biloray, Elizabeth Langan, Carlene Langan, Matet Langan, Charlie Abidjew, Cammait logao, Viray Lamong, Bitog Pario, ken Samuel Bagtad.
Dagiti met pito a dadduma pay ket nagsagrap ti “minor injuries” a nabigbig a da Darson Villasis, Nova Aniwasal, Aubrey Tuclab, Ronald Dom-ac, Calliw Pangulo, Jerico Apatan, ken Rein Hart Dom-ac.
Iti agdama, maobobserbaran ti kondision dagitoy.
